Comhlacht comhordaithe a bunaíodh i mBealtaine 2003 is ea Tascfhórsa Drugaí Réigiún an Iarthair (WRDTF). An fheidhm atá ag an tascfhórsa ná cur chuige comhpháirtíochta a úsáid chun taighde, forbairt agus feidhmiú a dhéanamh ar fhreagairt chomhordaithe a bheidh in oiriúint don réigiún, i dtaca le mí-úsáid substaintí.

Bunaíodh an WRDTF mar cheann de na príomh-mholtaí den Straitéis Náisiúnta Drugaí 2001-2008 agus clúdaíonn sé contaetha na Gaillimhe, Mhaigh Eo agus Ros Comáin. Tá sé mar mhórchuspóir againn an dochar a dhéantar le mí-úsáid drugaí do dhaoine aonaracha agus don phobal a laghdú go suntasach trí dhíriú ar laghdú soláthair, ar chosc, ar chóiriú agus ar thaighde.

Ba é an tAire Éamon Ó Cuív a sheol an plean straitéiseach WRDTF Shared Solutions i bhFeabhra 2006. Cur chuige réigiúnach i dtaca le mí-úsáid drugaí agus alcóil atá ann ina dtugtar tús áite do riachtanais áitiúla. Mar a léiríonn an t-ainm, aithníonn ár straitéis nach féidir le haon ghníomhaireacht amháin déileáil leis na fadhbanna ar fad a bhaineann le drugaí, ach trí oibriú le chéile beimid in ann úsáid a bhaint as comhphleanáil agus as réamhsmaointeoireacht chun comhréitigh agus pleanáil chomhtháite seirbhísí a bhaint amach le díriú in am ar fhadhbanna drugaí agus alcóil agus laghdú dá réir a dhéanamh ar dhrochthionchar na mí-úsáide drugaí agus alcóil.